Казахстан против Борат

Казахстанското министерство за надворешни работи се закани со тужба против комичарот Саша Барон Коен алијас Али Џи затоа што неговиот тв алтер его Борат го нарушувал угледот на Казахстан претставувајќи го како земја на пијаници чија главна забава е да тепаат крави и да пијат коњска урина.


Борат стана омилена омилена верзија на Али Џи откако неповторливо се соживеа со ликот на репортер од Казахстан, земја за која на Запад ретко кој случнал иако е 9-та по големина држава во светот (или, како што го опишуваат некои негови овдешни обожавателки: "borat e haos na dve noze. mora da imash iskustvo so borat i negovite situacii za da ti bide ok. gledaj povekje od negovite reportazhi. glej go lishen od mislata deka treba da bide 'mnogu dobar'. glej go napushen. borat e sofisticiran nevkus. borat e sociolingvistichki fenomen. borat e brend").

Прагот на толеранција кај тамошните власти бил прегазен по неодамнешното доделување на европските музички награди на МТВ во Португалија.

Шоуто го водеше токму Борат кој пристигна со пропелерски авион на Air Kazakh управуван од едноок пилот со шише водка кај себе.

"Не ја исклучуваме можноста господинот Коен да им служи на некои политички кругови кои имаат за цел да го претстават Казахстан во понижувачка улога. Го задржуваме правото на правна постапка за да ги спречиме ваквиот невкус кој нема никаква врска со цивилизираното однесување," изјави шефот на казахстанската дипломатија Јержан Ашкубајев.